Joh 1 | WSK | STEP | Duap te nunguningkiri Den bagakaso, nu Kaem ilak wete bagakaso, ale nu Kaem.

John 1

Den kari ko aratam

1 Duap te nunguningkiri Den bagakaso, nu Kaem ilak wete bagakaso, ale nu Kaem. ^{▼▼John 1:1 “Den” maso mu Jesus ko balso. Greek den te mu “Logos”, se English den te iwita guruguman: “the Word”. “Logos” ko ikia ilagala: “den se ikia”, “word and mind”. Jesus kumik te ana Kaem ko munan se ko ikia aguwaya mu wetang te arigisan ko ikisan: 1:18; 14:9. Buta se nup mu Jesus tuman.} 2 Duap te nunguningkiri nu Kaem ilak wete bagakaso. 3 Kaem nu te mel suen biya beteram, mel bo yam kota ipi me aratam, mel suen biya am nu te la bita saparam. ^{▼▼John 1:3 Kaem Jesus te mel suen biya beteram: 1 Cor 8:6; Col 1:16; Heb 1:2.} 4 Nu marak nunguning ko duap. Se marak nunguning umu kariimet nikim nungaram. 5 Se nikim mu tiromorom nikim tuiwoso. Se tiromorom mu nikim mu iramurokko me terong mam.

6 Kaem giram kari bo beteram se tairam, ko nup John. 7 Nu Nikim ko duap balukko tairam, kariimet suen la den mu ikimon ale ko nongomang ningi nunguning arukko. 8 Bare John kota mu Nikim mu mena. Nu am Nikim nukung ko duap kariimet nunga manukko tairam. 9 Nikim nunguning, kariimet nikim yawara nungarso, mu ali imi te tai kapurukko tom pingi aram.

10 Buta se nu ali imi te tai kaparam. Nu kota ali imi lilim nungam, kariimet ago nunga nungam, ale nongote tai kaparam, bare kariimet noko me ikiman. 11 Nu ko kariimet Israel nongote tairam, bare nuna ari meman. 12 Bare arikaya noko amilmilaman ale ko nongomang ningi nunguning aram, mu nu kariimet umutang nunga balam Kaem ko kuriang ko aratomonko balam. ^{▼▼John 1:12-13 Kariimet Kaem ko kuriang ko aratasan: John 3:3-6; Gal 3:26.} 13 Se nuna Kaem ko gomang te noko kuriang ko bilangaman. Bare nuna aliti nunam nonet nunga gue te mena, imet kari nunga ikia te mena, Kaem ko gomang te noko kuriang ko arataman.

14 Den kari ko aratam ale ana ningi tairam bagakaso. Ana noko nikim nup biya ago mu aringiman. Nu Kaem ko Namar suwanta se ko nikim nup ago tawun biya nu kumik ningi aniso wore aringiman. Nu den nunguning, kari gomang tua ago terong mam.

15 John noko dugu duap balam. Nu kariimet nunga manaruwa airam balam, “Kari ewerta ko ani ninga manem ale balukasam, ‘Kari bo ani agowom kaoram taiwoso mu aninga gira nunguningkiri, se ani noko bowa ningi. Mu awuk, tom ani me bilangerem tom te la nu bagakaso.’”

16 Ana suen la nu kote mel ningo ningo la giman. Nu marak ningo duap duap ningi awete nangaram. 17 Mu awuk, Kaem ko Law Den mu Moses te nangaram, bare ko saonga nunguningkiri, ko marak nunguning, mu Jesus Kristus te nangaram. ^{▼▼John 1:16-17 Law Den, se Jesus ko saonga nunguning: Rom 6:14; 10:4; Col 2:10.} 18 Kari bo ta Kaem kumik me arigam. Mena. Bare noko Namar suwanta ilak wete bagoso mu borta Nuet nanga kausam, ale nu kota tala Kaem.

Anuwa Kari John balam, “Ani Kristus mena,” mam, ko den

(Mat 3:1-12; Mark 1:7-8; Luke 3:15-17)

19 Juda supuling bibiya alo nuna priest saki se Levi saki mu nunga manorman se Jerusalem beteman ale John kote taiman ale isarman, “Ni awiri ya?” makasan.

20 Se John wetang te la balam, “Ani kari Kristus mena.”

21 Se nuna isarman, “Buta se ni awiri? Ni Elijah e?” Se nu balam, “Ani Elijah mena.”

Se aking isarman, “Agi Moses Prophet ko balukaso borta ni e?” ^{▼▼John 1:21 Moses Prophet bo tairukko balam: Deut 18:15; Acts 3:22.}

Se nu balam, “Ani kari mu mena.”

22 Se nuna balman, “Buta ni awiriya mu anananga manaruko. Se namanak kari nanga manorman se taiman mu diram nunga manornakko. Se ni keta nimi awuk balsam?”

23 Se John prophet Isaiah ko batoga te den aniram mu nunga maonam, “Ani,” mam, “kari ali sor garagarayam te baga se aiso ale balso, ‘Kari Biya ko lage nungal se te tairukko,’ ma balso.” ^{▼▼John 1:23 Isaiah 40.3.}

24 Se kari John kote taiman mu nunga ningi sang Pharisee. 25 Se nuna nu isarman, “Ni Kristus mena, ni Elijah mena, ni Prophet Moses ko balam mu mena. Se ni anape ko kariimet nunga anusam?”

26 Se John nunga den koma balam, “Ani yu te nunga anusam. Bare kari bo nenenga ningi bagoso mu nina nu me ko ikisan. 27 Nu aninga agowom kaoram taiwoso, bare nu aninga kiaram nunguningkiri, se ani noko suwik tuagu ko lakira ko mayang kutuwurikko me terong.”

28 Se munan isa John tuman imi mu Bethany wonong te aratam, yu Jordan koma worem bausa mu te. John sor umutang te kariimet nunga anukaso.

Jesus mu Kaem ko Sipsip Gotek

29 Ukiram se John Jesus nu kote taiwaram mu arigam ale balam, “Arigalko, Kaem ko Sipsip Gotek taiwoso uwoya! Nu kariimet suen la nunga memek kutuwurok giok ale ago kuerukko. ^{▼▼John 1:36 Kaem ko Sipsip Gotek: Isaiah 53:6-7; 1 Peter 1:18-19; Rev 5:6.} 30 Ani kari ewerta ko nina ninga manem ale balem, ‘Kari ani agowom kaoram taiwoso mu nu aninga gira nunguningkiri, se ani noko bowa ningi. Mu awuk, tom ani me bilangerem mu te nu bagakaso.’ 31 Nu awiriya mu ani ulengkala me ko ikikasam. Bare ani kariimet yu te nunga anusam imi mu Israel kariimet te ko ikimonko betesam.”

32 John akingtala balam, “Ani Korang Bur duruk te wore inanganang biton turan tai kaparam ale supuling awete daigam se arigem. 33 Ani me ko ikiem, bare Kaem aga balam se kariimet yu te nunga anusam mu nu giram iwita aga maonam, 'Ni kari bo anuwer se Korang Bur tai kapuruk ale supuling awete daigok se arik mu ikiko, kari imitang Korang Bur te kariimet nunga anuwokkowo ma baluko.' 34 Se ani mel mu arigem ale ani ninga manorsam, kari imitang Kaem ko Namar.”

Jesus olekem ilagala suwan nunga giam

35 Animan ukiram se John akingtala sor mu te tala bagaram. Nu ko olekem ningi ilagala arungak sanamiwaram 36 se Jesus aolak iluwam namawaram se arigam, ale balam, “Kaem ko Sipsip Gotek namawoso uwoya!”

37 Se ko olekem ilagala nu den mu balam se ikiman mu Jesus kowom karoman. 38 Kowom karowaman se Jesus giris palagam nungarkam ale nunga isuam, “Nina anape kupusan a?” mam.

Se nuna nu isarman, “Rabbi,” maman, “ni kawam awuk bore te anisam a?” (Rabbi masan mu ko nunguning mu ilagala, “Kausa kari” se “Kari biya”.)

39 Se nu nunga maonam, “Tairal arigalko.” Tom mu 4 o'clock bainga ningi iwita. Se ilak namaman kuwim te bagoso mu aringiman ale te ilak bagaman.

40 Olekem ilagala Anuwa Kari John ko den ikiman ale Jesus ilak namaman mu bo Andrew, Simon Peter ko uria. 41 Nu barasam diram namaram ko laun Simon arigam ale maonam, “Ana Messiah aringiman,” mam. (Messiah masan mu Kristus.) 42 Asele nu Simon tam ale ilak wete Jesus kote namaman.

Se Jesus Simon arigam ale balam, “Nika nip Simon, ni John ko kuriang. Bare udagi te mu nika nip Cephas.” (Nup Cephas mu Juda nunga den te, se nup Peter mu Greek den te, se nup ilagala mu ko nunguning mu “manga”.)

Jesus Philip Nathaniel ilak nunga giam

43 Aking animan ukiram se Jesus Galilee namurukko se Philip kupam arigam ale maonam, “Ani agowom karoko!” mam.

44 Philip nu Andrew Peter ilak nunga wonong duap Bethsaida ko kari bo tala. 45 Se Philip Nathaniel kote namaram ale maonam, “Ana kari Moses ko batoga te se prophet nunga batoga te ko balman mu ana aringiman. Mu nu Jesus, Nazareth kari, Joseph ko namar.”

46 Se Nathaniel balam, “Agi Nazareth wonong te pa mel yawara bo uwuta aratukko se ye?”

Se Philip balam, “Tair ale arikko!”

47 Se Jesus Nathaniel nu kote taiwaram se arigam ale balam, “Arigalko, Israel kari nunguning taiwoso uwoya! Kawel bo nu kote mena!”

48 Se Nathaniel Jesus isuam, “Ni awuk ta ani aga ikiem?”

Se Jesus nu maonam, “Tom Philip ni me ka arukaso mu te ni tam fig bowa ningi dagiwerem se ani karkem.”

49 Se Nathaniel balam, “Kari Biya, ni Kaem ko Namar, ni ana Israel nanga Kari Biya!” ^{▼▼John 1:49 Jesus mu Kaem ko Namar: Mat 14:33; 16:16.}

50 Se Jesus balam, “ Ni aitakta ani ago ko gemang ningi nunguning aram sumu, mu ni tam fig bowa ningi dagiwerem se ani karkem ale ka manorsam borta ko, ni gemang ningi nunguning aram. Mu mel gotek ani beterem. Bare udagi te mu ni kilek bibiya mu arikkowo!” Ale nu nunga maonam, “Ani nunguningta ninga manorsam, udagi te duruk kuring kaiguk se Kaem ko engel ani Kari ko Kuriang agate tarigi kapawomon se arigalko.” ^{▼▼John 1:51 Jacob ipingiram mel arigam: Gen 28:12.}

51